这一年的开年饭狠饱狠满足@西堤牛排

餐廳嘅環境唔錯，主色調仍然系同王品一樣——紅！紅得熾熱， 紅得浪漫， 紅得高雅！ 如果唔系我地咁大班人，應該幾浪漫幾有氣憤嘅！

餐廳嘅吊燈

主要都系2人臺同4人臺為主

而我地咁多人， 當然需要同餐廳提早預約啦！ 所以餐廳特別為我地準備咗一張長臺，咁大個女都未試過系長臺上面食西餐呢！真系夠曬氣派夠曬grand！  可惜我唔系最早到嘅一位， 所以影唔到長餐台嘅全貌咯~~ 

等齊人之後，服務員就逐一幫我地點餐， 今次我地每人叫左一客128嘅套餐，從餐前麵包到湯品， 主食， 甜品， 飲品， 一共7道！其實食到中間就已經非常飽啦，皆因非常多飲品，可以講，齋飲水都飲飽咗啦！然後主食嘅肉，分量超足！！！ 所以其實無必要每人要一個套餐咁多嘅！ 如果系三五知己去食的話， 點2個套餐，再加一兩樣單品就夠了！

餐前小食：

芝麻奶油麵包配蘑菇醬——麵包系剛烘好， 仲系熱嘅， 唔點任何醬汁都已經好好味！ 配嘅蘑菇醬我地一致認為好香蒜味，好特別！

沙律：
馬德裡薄切生牛肉沙律——賣相好靚，生牛肉好新鮮，味道唔錯哦！

焗海鮮時蔬沙拉——其實果個所謂嘅“時蔬”就系鮮淮山，上面有d煙肉之類嘅嘢， 系熱食嚟嘅，幾飽肚噶！

鮮蝦蘆筍沙拉——賣相好精緻，個蝦食得出好新鮮，蘆筍都好清甜，旁邊配嘅唔知系咩醬呢， 幾特別！

歐風果蔬鮮蝦沙拉——呢個系2小碗嘅， 有蝦，有墨魚仔，仲有d奇異果粒，火龍果粒，哈密瓜粒，味道嘛，我覺得太酸啦，唔系好啱我口味咯！

湯：
魚唇膠原濃湯——應該有一塊魚唇吧，仲有d鹹蛋黃，我覺得味道幾甜味， 不過有同事就話好腥喔~~

奶油菌菇濃湯——就得面頭一小塊菇， 味道就系普通西式湯咯~~

玉米濃湯——又系常見嘅西式湯，味道估計都系中規中矩吧！

經典羅宋湯——無圖片咁吸引，味道酸酸辣辣，幾醒胃

元氣參果雞湯——同事話味道唔錯哦！

百香雪酪： 系用餐中間送上嘅， 好酸好酸嘅小杯飲品， 用來消除滯氣， 我幾中意呢個雪酪，因為個餐真系好飽， 飲翻d酸嘢真系精神曬！

 主食：
西西里香烤厚牛排——的確非常厚，但就絕對無4CM咯， 估計2-2.5cm啦， 牛味唔算好十足

匈牙利全熟牛排——上碟時已經切好左噶啦，賣相同味道都同我地平時食嘅牛腩相似度有90%！完全唔需要用刀切開，幾軟！ 我覺得味道其實都ok， 不過d同事就覺得單點價值68蚊食牛腩，好似唔多值咯~~

香烤牛小排——呢個系唯一一道帶骨嘅主食，亦都系我最中意嘅主食， 一共三件，牛味濃郁， 好夠火候！

意式松茸牛排——實物同圖片個樣完全唔一樣！完全想像唔系系一大塊方形嘅牛肉， 唔知幾多成熟， 不過仲系好紅！呢塊大肉，厚度同西西里差唔多， 味道比西西里濃，不過食唔出什麽系“松茸”咯！ 估計就系牛肉上面果一小搓類似菇類嘅嘢吧！

歐風紅酒烤牛舌——好厚一塊， 味道唔錯！牛舌好爽口，無牛肉咁滯咁漏！

經典海陸雙拼——可以一塊龍利柳配豬扒，或者配一塊牛小排！ 豬扒唔會好厚， 食得出系豬頸肉，烤到好脆口， 但食到最後都系會覺得漏，龍利柳唔錯， 整得幾好，好食過好多西餐廳嘅出品！

甜品：
抹茶松餅冰淇淋——4個甜品裏面覺得呢個最好， 抹茶鬆餅味道唔會太苦， 雪糕系香草味嘅， 種有d花生碎碎，幾有口感！ 記得“趁凍食”，咪先d雪糕好快溶

紅豆抹茶慕斯——我只食左外層嘅抹茶慕斯，覺得呢個抹茶味太重啦， 重到有d苦！ 無食道裏面，所以唔知到底d紅豆系邊個位置，唔作評論

黑森林巧克力慕斯——好普通嘅朱古力蛋糕，無咩特別！只能講慕斯同蛋糕都幾滑， 好幼細

焦糖南瓜布丁——非常南瓜嘅布丁！南瓜味比蛋味重， 中意食南瓜嘅同學值得一試！

飲品：
繽紛水果熱茶——正常嚟講應該系同圖片一樣， 有個透明壺同一隻透明杯子嘅， 但呢間無咁做， 就系用只普通嘅白色杯裝住， 頓時無曬feel咯！

風味焦糖熱奶茶——同事話呢個唔錯哦！

繽紛蔬果汁——同事話味道好怪， 唔推薦

其他飲品無逐一問人，所以大家到時自己試試咯！

最後送上店家特意送俾我地嘅雞尾酒，好似一束花咁， 非常有藝術感的說！ 可惜缺少乾冰， 如果有乾冰的話， 效果更好！

對於本次用餐， 本人覺得一般般啦，過得去咁咯， 但唔至於印象非常好果種咯~~ 去過廣州王品嘅同事（我未去過廣州嘅王品）話呢度服務不如王品好， 出品亦都不如王品， 作為去過台灣本土嘅王品嘅我來講，感覺更甚！！！  畢竟還是一分錢一分貨嘛！！  而對於從來都未去過王品嘅同事來講， 佢地就話覺得服務非常好！ 所以大家自己思考下咯~~~

之所以覺得一般般可能系因為我地實在太多人了，服務員嘅服務唔系好到位， 點餐落單時根本無問過我地主食需要幾成熟，亦都無問過需要配咩汁， 所以上面d圖片嘅主食， 全部都系無淋汁嘅... 直接服務我地20幾個人就系得一個服務員！！服務態度的確系非常好， 可惜真系一個人兼顧唔到我地咁多人咯~~~而另外有2-3個系輔助上餐而已， 所以態度都系一般般！ 仲經常上錯嘢添~~  對於多人用餐方面， 希望西堤以後會系人手安排上注意下咯！ 

食物出品其實幾有水準嘅！ 主食嘅肉分量都非常足， 如果share 的話， 其實都幾抵食噶！算系一間綜合水平相當唔錯嘅餐廳！ 各位仲未去過嘅同學仔，可以系情人節同你嘅摯愛吃肉去啦！！！

關於西堤嘅心得同小tips

其實西堤系屬於王品集團旗下比較廉價嘅餐廳，套餐分別的價格為78 128 158 ， 78蚊嘅套餐只適

用於週一至週五嘅午餐~~而且選擇相對較少！ 158蚊嘅套餐選擇系最多嘅，總之豐儉由人，大家睇住荷包就系啦！

2月29日前到店消費， 滿100就會送30蚊現金券下次消費使用，不過好似張現金券有效期到31mar噶咋，對於本人來講，作用唔大咯！

另外，如果系慶生或者什麽周年紀念的話， 餐廳仲會特別提供雞尾酒同爆谷，仲有拍立得一張！ 唔需要提供身份證明！所以建議同學們先打電話預約好，講話慶祝生日， 店家就會為你精心準備好！（所謂不要白不要嘛，大家都懂嘅！）

唔同就系在於價錢咯， 佢系屬於王品旗下相對廉價嘅餐廳！ 唔使收10%嘅服務費！ 出品還算過得去！不過你去過王品的話， 就會覺得一分錢一分貨咯！ 

多謝你嘅支持吖！！！

er.... 應該可以吧， 因為每樣嘢都有單點嘅價錢嘅！

哈哈， 我地成晚都系度影相啊！ 又影食物， 又影下人咁， 幾歡樂...