【绽放2012】气派十足的齐鲁王府~~不外如是

        初六去老表屋企拜年，老表个边人丁兴旺，滴晚辈多到连我依个“长辈”都分唔清边个打边个。

。。场面相当开心热闹~~~中午老表带我地去黄石路个间山东老家食饭，订咗间大房（足足

28个人，开间山寨厂都得啦~~）

       依间山东老家面积相当大，门前停满各式小车。楼层唔多，居然都有观光电梯，正上方有一牌

匾写着：齐鲁王府，下面仲有关二哥撑住~~~真系气派十足去片。。。

地下一侧系海鲜池

另一侧摆住好多土特产

我地订的房系二楼，装饰布局比较古典雅致，好喜庆

       入到间包房，迎面系一张相当庞大的餐台，我咁大个人都系第一次见咁大张餐台（少见世面

啊。。）影依张相都要企到门口至拿得齐入镜~~~坐咗17个人位置都系好宽松，相信20个人

都冇问题。。。。旁边仲有一张正常size的台，滴大细路坐晒个边。

       老表因应长辈简单实惠的要求来点菜，冇点什么海鲜类的菜，好快就上菜了。首先系人手一块

的酱骨架同一碟精致的蝴蝶骨。

酱骨架味道浓郁，肉焖得淋够入味，稍偏咸

蝴蝶骨系浓油赤酱，肉质软嫩，酱汁带酸酸甜甜的味道，应该系落咗陈醋同蜜汁，仲有点黑椒味，

整得都几好食~~~

       跟住上几个主食同青菜，有两份饺子，黑米饼、葱油饼和草帽饼各一份，川味煸四季豆、

呛炒包心菜、拍青瓜，因为个转盘经常在转动，我想影相都比较困难，加上有滴菜转到过来都

已经夹咗好多，所以有嘀菜式冇影，有嘀相唔清~~~拍青瓜冇试到，唔知好唔好食，亦冇

相~~

饺子皮薄好滑溜，馅料鲜美好食，系几出色的北方面点，值得推荐至于草帽饼同葱油饼就整

得麻麻地，好干硬，尤其系葱油饼，仲不如老爹整的好食~~~

黑米饼几特别，颜色似黑炭，食落就系小煎饼的味道，微甜，算系健康食品啦~~

四季豆麻辣味，在座的都食唔到辣的，系我仲偶然食下（怕热气，唔敢食多），都算几辣下~~~

我都系中意依碟包心菜，即系椰菜，辣度适中，菜炒得好爽口，仲有嘀粉丝搭住~~~

        接着又系几个主食，一碗大汤面、一份水晶锅贴和一份京酱肉丝配春饼。。。

依碗拉面整得好差，面都煮过了，好淋，味淡，仲不如自己随便煮的好食~~~

锅贴煎得几靓，食落都几香口，唔错~~

依碟我就中意食春饼，其实卷咩料我都中意食。。。

       仲有碟京葱炒羊肉片，冇影到相，我觉得都唔错，不过在座的好多都食唔惯羊肉膻味，所

以唔多受欢迎。上咗碟蒜香骨，卖相都可以，但我食咗一块都想吐，蒜味重到嘀肉都带苦涩

味，好难食~~应该系我食过最难食的蒜香骨了。一碟烧鸡，卖相一般，睇落有点干，色泽

唔靓，又系冇相~~~

       最后上的主菜系酸菜鱼，个盆好大，分量就系普通一条鱼咁多啦。唔系川式的麻辣酸菜

鱼，依个净系泡椒的辣，味道一般，有滴盖唔住鱼的腥味，而且觉得好似熟得唔透~~~一定要提

的系个服务员MM，真系认真离谱，捧着咁大盆菜上台，竟然对眼系望住隔离部电视机，且精神极度集中，系道追剧~~~我地见佢捧到人头顶，提醒佢注意，佢居然毫

无反应，对眼依然系睇住电视~~~真系唔知依道系点培训嘀员工噶！！

       最后上咗窝黑米粥，煮得好绵，甜甜地几好食~~~埋单系1998大圆（折后价）。依餐饭我

觉得真系食得麻麻地，嘀菜式都系家常大路货，亦做得一般，冇乜特别，有嘀仲不如普通餐

馆。分量唔多，尤其系摆系个张巨台上，更显袖珍，好多都系主食，但价钱就真系相对贵得可

以了~~~我其实好耐以前就想食下山东老家了，久闻山东菜系中国四大菜系之一，都想试下鲁菜

的特色，但依餐食到的系同其他北方菜系好似冇乜区别。。。可能我地亦冇点到佢的特色菜吧我后来上DP睇评价，亦冇咩特别的推介菜式。倒是看到“拿一杯铁”写的一篇精彩的长篇

论文令我多少了解鲁菜系点样的，而依餐饭食完我对鲁菜的实际印象一样仲系咁模糊~~~

           半夜发帖，写到@眼甘甘@，欢迎留引加分吖