饮饮食食又一日

第二次报名参加点评嘅试食活动，很好彩咁被抽中，于是乎很好彩咁开始左我嘅试食旅程。

活动当日我很早就出门了，坐上地铁用左差唔多一个钟左右到达天河东路，心谂住我个大路痴估计都系要用多一个钟先至可以稳到见铺头嘎啦，点知，我居然RP爆发，半个钟唔使，我就企系人地门口啦。无聊得我居然仲行去体育东路间星巴克买嘢饮，话虚度下自己D时间。睇住身边D人个个行路都好似装左风火轮咁，霎时间觉得自己过得很休闲。

短信确认之后直接行入餐厅，有几位一齐参加今次活动嘅TX已经到场，又等左一排，大概一点钟左右终于开餐。事实系，我可以等多一排嘅，因为我一D都唔饿（%>_<%）......

首先上嘅系餐前包同蒜蓉面包，餐前包沾D店家特制加左D橄榄油嘅罗勒汁味道一流，正。蒜蓉包就味道偏咸，尤其系中间位置，抑都可能放上来嘅时间太耐，搞到食果阵已经无感脆。话时话，大家摞相机影食物嘅热情真高（= = ）。

凯撒沙律做得唔错，口味非常清新，一向中意食沙律嘅我食左唔少，入边有D小肉块脆脆的，口感很爽。一个字，正！

跟住落来就开始系main course嘅表演时间啦，首先登场嘅系砂锅芝士，估计大家食用方法错误，所以呢味餸十分之惊讶咁跌出大家感兴趣嘅范围。但系事实上，佢应该几野味下嘅，至少，人地上边铺左一层厚厚嘅肉啊...下边系无与伦比嘅芝士啊...

跟住落来系西班牙土豆饼，虽然我地笑佢话系薯仔炒蛋，但系食起身香味很浓郁，而且唔会淡而无味，系个唔错嘅选择。卖相？有D似系屋企阵阿妈成日整嘅蚵仔煎......

之后登场系两款意粉，墨鱼汁果只我认真无咩Feel，睇起身就系一团黑色嘅面捞埋一齐，而且食入口发现根本无咩墨鱼味，反而系番茄味十足，话时话，佢家番茄汁整得唔错，加分。芝士廉汁烟肉意粉就比较合我心意啦，小小甜味，而且比较有新鲜嘅感觉，推荐！

Here comes my favorite!!!烟熏鸭胸肉配红酒汁，之所以话系我最爱，系因为佢真系肉，好多肉，好好味嘅肉，但系同时都系我当场食得最少嘅一味，后悔啊，就连D薯蓉我都无食到，下次都系唔好扮矜持啦......同样问题，红酒味系边度，阿叔我真系食唔出。 

跟住落来系最后一味主菜，吞拿鱼Pizza，讲真，当我发现上边铺满晒洋葱果阵我有一瞬间唔系几想食，但系食左之后先发现佢嘅饼底十分好，其实我谂应该大部分都比较中意薄身嘅饼底，佢家嘅饼底唔单止薄，而且仲好脆，真系有一种食饼干嘅感觉，推荐！

饭后当然少不了甜品，两份提拉米苏+一份芝士蛋糕+一份香蕉班戟。提拉米苏有一种醉人嘅感觉，你无估错，入边系有酒味嘅！而且非常松软，入口即化，可以话差唔多系我食过D提拉米苏入边最好食嘅一次（注：我唔中意提拉米苏嘎！）。芝士蛋糕可能因为之前自己食过太多更加好味嘅所以呢款并无留低几多印象，记忆中就系有翻D柠檬味，都几清新，唔会腻。可怜的香蕉班戟，被相机D高温度融到差唔多无晒，不过，真系好好味，于是我心入边一直系度滴血......

食完之后大家都坐系度吹左一阵水，发现原来得我一个仲系学生哥，于是，惭愧惭愧，我自己隐藏自己先。试食团everybody都好好人好开朗，的确食得好happy，如果真系得闲可以咁度过一个下昼，又真系写意人生啦~~~~~~真希望下次仲有咁嘅机会，体验更多唔同嘅美食，同更多试食团嘅各位分享自己D经历。开心，系要一齐Share嘎嘛~~~